Frágreiðing frá ársaðalfundinum
19/4-2010
Aðalfundurin varð hildin í MBF-húsinum sunnudagin 18. Apríl kl 15 í MBF-húsinum, har eini 35 fólk møttu.
Annfinnur Johansen var orðstýrari á fundinum.
Tríggir nevndarlimir skuldu veljast, og allir tríggir, Kristiana Rein, Petur Páll Mikkelsen og Mourits Joensen, stillaðu upp aftur, og vóru hesi trý afturvald uttan mótvalevni. Ein nýggjur eykalimur varð valdur, og var tað Kathy við Skipá í Havn. Hon arbeiðir á Tjaldurs Apoteki og er limur í Diabetesbólkinum á Apotekinum. Vit heilsa henni vælkomnari í nevndina.
Nevndin hevur í 2009 hildið fastar nevndarfundir hvønn seinasta hósdag í hvørjum mánaði. Um neyðugt er, verða nevndarfundir eisini hildnir umvegis teldupost.
Felagið hevur havt nøkur tiltøk seinasta árið:
Umboð fyri felagið, Meinar Ortind, luttók á Nordisk Ungdomsseminar í DK í juli mánað.
Heilsurenning var undir heitinum:” Renn fyri lívinum” í september, eini 70 fólk runnu fyri diabetes, men eisini í Suðuroy runnu eini 50 fólk fyri diabetes
Kunningartiltak á torginum í SMS saman við Hjartafelagnum, Fólkaheilsuráðnum og Tjaldurs Apoteki í sept.
Altjóða Diabetesdagur 14. November varð hildin í Sandavági, 65 fólk møttu í himmalsins ódnarveðrið til ein sera góðan, upplýsandi fund um Diabetes typa-2. Sama vikuskiftið var eisini kirkjan upplýst í bláum liti.
Jólahald fyri børn og ung við diabetes og familjum teirra varð hildið í Hornahúsinum um hálvan december.
Í august mánað luttóku formaður og næstformaður á Norðurlendskum Diabetesfundi í Tampere í Finlandi.
Altjóða Diabeteskongress varð hildin í Canada í oktober, og har luttóku kassameistari og skrivarin.
Diabetesfelag Føroya varð biðið um at gera viðmerkingar til nýggju lógina um Heilsutrygd, og hevði fleiri viðmerkingar.
Felagið hevur eisini gjørt vart seg í juni 2009, tá ið Almannastovan knappliga minkaði kostískoyti út 363 kr niður í 173 kr.
Felagið harmast eisini um, at versnandi umstøðunum hjá fólkapensionisrum, sum bert hava fólkapensjónina at liva av.
Vit hava eisini gjørt vart við, at fótarøktin ikki má skerast burtur, og tíbetur virkar gamla skipanin sum er. Gamla skipanin var millum fótarøktarin og Almannastovuna, meðan hon nú virkar millum fótarøktara og Heilsutrygd.
Tá ið nýggja Heilsutrygd fór at virka frá 1. April eftir nýggjari lóg og við nýggjum kunngerðum, er ikki at undrast á, at onkrir vansar eru við skipanini, soleiðis er ofta við nýggjum skipanum. Eftir hesu nýggju lóg skulu fólk við diabetes hava recept við á apotekið til alt, sum verður útflýggjað umvegis Heilsutrygd. Tey skulu m.a. hava recept til: nálir til insulinpennin og insulinpumpur, lancettir at prika hol á fingurin, tá ið blóðsukur skulu taksast, og til teststrimlar til blóðsukurmátitólið.
Landsapotekarin, Heri Mørkøre, helt fyrilestur um nýggju skipanina, og legði fólki eina við at biðja læknan skriva á receptina, at hon er galdandi í antin eitt ella tvey ár. Hetta lættir sera nógv um hjá bæði apotekinum, men ikki minst hjá fólki við diabetes, sum annars mugu renna hjá lækna í heilum at fáa skrivað út receptir. Soleiðis er skipanin nú, men vit vóna og vilja arbeiða fyri, at skipanin gerst smidligari við tíðini.
At enda á fundinum góvu vit “ársins herðaklapp”, sum í ár fór til tær tríggjar, sum tóku stig til at fáa diabeteskanningar inn í læknakanningina hjá øllum 9. Floks næmingar í landinum. Tær gjørdu eina “pilotkanning” av 200 næmingum í 2009, og hava nú fingið játtað pening til eina stóra kanning av øllum 9. Floks næmingum í landinum. Hetta er eitt frálíkt tiltak. Tær tríggjar eru:
May-Britt Skoradal Jacobsen, Marjun Vilhelm og Gunnbjørg Guttesen.
Árið 208 var ikki gott fíggjarliga hjá felagnum, tá ið vit endaðu við einum undirskotið. Tað hildnaðist tíbetur nakað betur í 2009, tá ið vit høvdu eitt lítið yvirskot.
So samanlagt var árið 2009 nøktandi, bæði fíggjarliga og hvat aktivitetum viðvíkir.
Í kaffisteðginum var framsýning av serliga góðum norskum hosum og sokkum. Ein norskur skíðrennari, Bjørndalen, hevur verið við at menna hesar hosur. Fólk í Diabetesfelag Føroya hava roynt hesar hosur og kunnu viðmæla tær. Tær síggjast og kunnu bíleggjast á www.hosan.fo |
